بحبك يا أمي

انهارده عيد الأم و السنه دي بالذات عيد الأم ليه طعم تاني عندي .. يمكن مر شويه .. بس في الاول و الاخر هو اجمل مناسبه علي وحه الارض .
عيد الأم السنه دي عاوزه اقول فيه عيد أم سعيد لكل أم في الادنيا .. اولهم أمي ربنا يخليهالي .. كل عيد أم و انتِ معايا و بصحه و بخييير يا رب قولو آميييييييييييييييييين :)
تانيهم تيتا بقولها كل عيد أم و انتِ احلي أم و احلي جده .. اول عيد أم حيعدي عليا و انتِ مش معايا .. لو كنتي سمعاني عاوزه اقولك انه ملهوش طعم من غيرك ربنا يصبرنا علي فراقك .. و اخر امهات عاوزه اقزلهم كل عام و هما بخير امهات الشهداء يمكن اتحرمتي من انك تسمعيها من ابنك او بنتك بس كلنا بقولهالك و بكل حب و مشاعر صادقه كل عام و كل أم بخير يا اجمل مخلوقات في الدنيا :):):)

اكتر حاجه حره عملتها في حياتي ... ...................... روحت استفتيت :D

بابا كان خايف جداً طبعاً بسبب اللي كان بيحصل في الانتخابات اللي كلنا عارفنها بس انا كنت مصره و كان طبعا هدفي الاول و الاخير هو البلد و الايجابيه اللي بننادي بيها كلنا و بتنادي بيها ثورتنا .. و كنت مصره علي الاستفتاء لان الحظ محالفنيش اني احضر الثوره و انزل مع الناس اللي احسن مني بكتييييييييييييييييير .. والا حتي اتزل بعد الثوره ..
و كان اهم حاجه عندي اني اشارك لان الايجابيه اللي خلقتها فينا الثوره لايمكن ان حد يقتلها فينا ..
الحمد لله بعد رضاه علينا و وقفته جنبنا و ربنا هو اللي حط فيا كل العزيمه و الاراده دي .. الشيخ في صلاة الجمعه دعا الناس للاستفتاء و ده كان حافز كبير جدا لبابا انه يوافق ..
فعلا جه اليوم المنشود 19-3-2011 و روحت و استفتيت .. ولقيت ناس كتيييييير قوي رايحين ناس من كل الاعمار من اول 18 ينه السن القانوني لحد الحاجه و الحاج العواجيز و كمان الام شيفاها شيلا بنوتيتها 3 , 4 شهور و نازله تستفتي معجزه اللي حصل انهارده ده والله .. كله حاسس بدوره الايجابي .. كله عاوز يغير في البلد ..
روحت و لقيت مكاتب كتييييير جدا كانت الساعه 9.30 الصبح سجلت اسمي و قلت رايي و حطيط ايدي في الحبر :D و روحت حاجه مخدتش اكتر من دقيقتين بالظبط .. و دي المعجزه ان حاجه تبقي تبع الدوله و تخلص بسرعه ..
نيجي كمان للي اهم منه .. اني لاول مره برضه انزل فيوم فيه استفتاء او انتخابات .. و لان فرق السما من الارض طبعا .. البلد زحمه اه .. وده علشان الناس كلها بتستقتي .. لكن الدنيا هاديه و امان .. التاكسي و احنا مروحيين مبسوط انه قال رايه .. قال كده بالكلمه .. الناس كلها فرحانه حاسيين اننا بنعمل حاجه انهارده كنا قبل كده نروح منروحش مفيش فايده .. الكلام عجبني قوي .. و احنا ماشيين السواق خبط تاكسي جنبنا واقف والله الراجل اللي اتخبط قال للسواق اللي كنا راكبينه والا يهمك المهم انت كويس و الله العظيم بقي دول سواقين التاكسي فس مصر بقي هي دي اخلاق المصريين .. اه هي دي .. هي دي الاخلاق اللي اتغطت باليأس اللي كان عايش فيه الشعب .. بالجوع اللي كان بيموت الاطفال بالظلم .. الناس دلوقتي تلاقيها ماشيه والرضا باين عليها .. الثوره لسه محققتش راتفاع اجور والا الاقتصاد بقس زي الفل لا .. بس الثوره ملت قلوب الناس بالامل .. و حسستهم انهم بكره حيبقوا احسن .. وانا واحده من الناس اللي شايفه ان بكره اكيد انشاء الله احسن ..
هو ده كان يومي هو ده اجمل ايام حياتي .. مهما كان نتيجه الاستفتاء بنعم او لا .. مهما كانت مع رايي او ضده .. المهم ان الشعب هو اللي اختار و اللي فمصلحت البلد هو اللي يحصل .. :)

مقدمة من واحدة فرحانة

من اجمل الحاجات في الدنيا انك تعمل حاجة كان نفسك تعملها من سنين و تعملها و انت مقتنع بيها و تقاوم كل اللي ممكن يقف قدامك عشان تعمل بس الحاجة اللي انت مقتنع بيها .. اولا احب اقول ان دي مش اول مدونه اعملها لكن كل المدونات اللي عملتها قبل كدة مكنتش بلاقي فيها نفسي .. كانت مجرد مكان بعرض فيه شعر او رسمة او مقال بس ..
لكن بعد الثورة بعد ما افتكرنا اننا بني ادمين ليهم حقوق و عليهم واجبات .. لما حسينا اننا لينا صوت و ممكن يتسمع .. بعد ما حس كل حد فينا ان ايزاي كنا ساكتين كل ده .. ايزاي كنا راضيين بكل ده .. ايزاي قابلين كل ده .. و كل حد فينا كان حاطط رايه في راسه ده لو كان عندنا راي اصلا بعد ما اتقتل فينا اي روح وطنيه .. او قدره علي التعبير بعد ما كل ده كان متفتت وسط تعليم ضايع و مرتبات لا تذكر و مشاكل ملهاش اول والا اخر .
دلوقتي بس عرفنا يعني ايه مواطن يعني ايه صوت يعني ايه حق يعني ايه واجب يعني ايه حريه ..
و عشان كده انا قررت اني اعمل مدونه و اسميها روح حره لاني قررت ان روحي لازم تبقي حره .. و كل روح فينا لازم تبقي حره ..
عملت المدونه و كان نفسي اكتب اكتر حاجه حره عملتها .. دورت بصراحه ملقتش .. و كنت مستنيه و حاسه اني لازم اعمل حاجه للبلد بعد ما امنت ان الحر هو اللي لازم يكون له هجف فبلده و لبلده و هدف فدينه و لدينه مش مجرد هدف شخصي و بعد كده كل شيء يهون .. وكانت الحاجه كما يلي ...
في المقال الاول في المدونه :) ;)